کتنا ہنستی ہو تم وہ بھی بغیر کسی وجہ کے میں تمہیں چیلنج کر رہا ہوں کہ تم ایک منٹ تک مجھے اپنی کھی کھی روک کر دکھا دو

میں دونوں ہاتھ باندھے مصنوعی غصے سے اسے گھور رہا تھا

سوچ لو اگر میں نہیں ہنسی تو رو دوں گی 

اس نے اپنی ہنسی پہ قابو پاتے ہوئے بمشکل اپنی بات مکمل کی

نہیں روئوگی مجھے پتا ہے تم سے اپنی ہنسی کنٹرول ہی نہیں ہو گی

میں نے تنک کر اپنی ناک سے مکھی اڑائی 

چیلنج منظور ہے مسٹر

وہ میرے بلکل سامنے کھڑی ہو کر میری آنکھوں میں دیکھنے لگی

ٹھیک ہے یور ٹائم سٹارٹس ناؤ

میں نے ایک نظر اپنی کلائی پہ بندھی گھڑی کو دیکھا اور پھر اسکے چہرے کو بغور دیکھنے لگا

ایک

دو

تین

چار

پانچ

پسِ منظر میں کوئی من چلا ہمارے اس ایک منٹ والے چیلنج سے محظوظ ہوتا ہوا باآواز بلند گنتی گننے لگا تھا

پہلے دس سکینڈز گزرنے تک اسکا چہرہ سپاٹ ہو چکا تھا اور میں ہارنے کے ڈر سے عجیب و غریب شکلیں بنا کر اسے ہنسانے کی کوشش کرنے لگا مگر اگلے دس سکینڈز میں وہ کہیں کھو چکی تھی میرا خوف مزید بڑھ گیا اور میں اسکے چہرے کے سامنے ہاتھ لہرا کر اسے اپنی جانب متوجہ کرنے کی کوشش کرنے لگا 

اچھا سنو میں تمہیں ایک لطیفہ سناوں؟؟

میں یہ چیلنج ہر قیمت پہ جیتنا چاہتا تھا عموماً جب میں اسے لطیفہ سنانے کا کہتا تھا تو وہ سننے سے پہلے ہی پاگلوں کی طرح ہنسنا شروع کر دیتی تھی مگر اس وقت وہ سوچوں کے سمندر میں ایسا غرق ہوئی کھڑی تھی کہ شاید میری بات بھی نہیں سن رہی تھی 

چھتیس

سینتیس

اڑتیس

انتالیس

چالیس

گنتی کرتے من چلے کی آواز اب پرجوش سی ہوتی جا رہی تھی

ایک سڑک کے درمیان میں بہت سارے لوگ کھڑے ہوتے ہیں قریب سے ایک لڑکے کا گزر ہوتا ہے تو وہ اس مجمعے کو دیکھ کر متجسس ہو جاتا ہے اور رش میں جگہ بنا کر آگے جانے کی کوشش کرنے لگتا ہے مگر اسے کوئی رستہ نہیں دیتا

یہ اسکا پسندیدہ لطیفہ تھا جو وہ ہر بار سنتے ہوئے نئے سرے سے لطف اندوز ہوتی تھی مگر اب وہ نہیں سن رہی تھی پچاسواں سکینڈ شروع ہوتے ہی اسکی شفاف آنکھیں پانی سے بھر گئیں پھر پلکوں کی جھالریں آپس میں ملیں اور وہ بوندیں بہہ کر دھوپ کی تمازت سے گلابی پڑتے اسکے گالوں کو بھگو گئیں 

میں آتی ہوں

یکدم اسکا ٹرانس ٹوٹا اور وہ چہرہ صاف کرتے ہوئے مڑ گئی وہ چیلنج جیت چکی تھی مگر نجانے کیوں وہ میرے ہارنے پر مجھے چڑانے کیلئے نہیں رکی 

رکو تم کہاں جا رہی ہو

میں بے چین ہو کر اسکے پیچھے لپکا

کچھ دیر تنہا رہنا چاہتی ہوں

پھر وہ بنا کچھ کہے مجھے الجھا کھڑا چھوڑ کر تیز تیز قدم اٹھاتی مجھ سے دور چلی گئی پھر گنتی کرتا وہ من چلا بھی میری ہنسی اڑا کر وہاں سے چلا گیا اسکے بعد میں نے اسے کبھی یہ چیلنج نہیں کیا تھا کیونکہ میں اسکی آنکھوں میں آنسو نہیں دیکھ سکتا تھا اور میں نے اسکی بلاوجہ کی ہنسی سے چڑنا بھی چھوڑ دیا تھا اور پھر وہ بھی کبھی میرے سامنے روئی نہیں تھی سب کچھ نارمل تھا جب کئی سال بعد ایک دن اچانک اسکا فون استعمال کرتے ہوئے میں نے نوٹ پیڈ کھول لیا جہاں بہت ساری ادھوری تحریریں پڑی تھیں وہ شاید اسکے احساسات تھے جنھیں وہ کبھی مجھ سے نہیں کہتی تھی میں ایک ایک کر کے انہیں کھول کر پڑھتا گیا انہی میں سے ایک نوٹ یہ بھی تھا

"تمہیں اِن بھوری آنکھوں کے افسانے پڑھنے کی خواہش ہے جو خوابوں کے ستارے نوچے جانے کی وجہ سے زخمی ہو چکی ہیں 

مگر میں تمہیں اپنی آنکھوں کی کہکشاؤں کے پیچھے چھپی کرب زدہ افسانوی دنیا تک رسائی نہیں دونگی

مجھے اپنے کرب کو اپنی ذات تک محدود رکھنے کی عادت ہے 

میں تمہیں اپنی لایعنی باتوں اور بے ساختہ ہنسی سے ہمیشہ خوش گمان رکھوں گی"

اور اسکی یہ بات پڑھ کر میری الجھن ختم ہو گئی مگر اس نے مجھے اتنا عرصہ خوش گمان رکھا اور میں رہا آگہی کا یہ دکھ میرے وجود میں گہری اداسی چھوڑ گیا

 #